Ինչպե՞ս օտարերկրացին կարող է ընկերություն գրանցել Հայաստանում 2026 թվականին

Ինչպե՞ս օտարերկրացին կարող է ընկերություն գրանցել Հայաստանում 2026 թվականին

Հայաստանում բիզնես սկսելու համար պարտադիր չէ լինել Հայաստանի Հանրապետության քաղաքացի։ Օտարերկրյա քաղաքացիները կարող են Հայաստանում հիմնել ընկերություն, լինել դրա 100% սեփականատերը և իրականացնել ձեռնարկատիրական գործունեություն՝ Հայաստանի օրենսդրությամբ սահմանված կարգով։

Եթե ցանկանում եք Հայաստանում բացել ընկերություն, ստորև ներկայացնում ենք հիմնական քայլերը, անհրաժեշտ փաստաթղթերը և այն իրավական հարցերը, որոնք պետք է հաշվի առնել նախքան գործունեություն սկսելը։

Կարո՞ղ է օտարերկրացին Հայաստանում ընկերություն հիմնել

Այո։ Օտարերկրյա քաղաքացին կարող է Հայաստանում հանդես գալ որպես ընկերության հիմնադիր և մասնակից։

Ամենատարածված կազմակերպաիրավական ձևերից մեկը սահմանափակ պատասխանատվությամբ ընկերությունն է՝ ՍՊԸ-ն (LLC)։

Ընկերությունը կարող է ունենալ մեկ կամ մի քանի մասնակից, իսկ օտարերկրյա քաղաքացին կարող է հանդիսանալ ընկերության միակ մասնակիցը։

Այսպիսով, շատ դեպքերում Հայաստանի քաղաքացի համահիմնադիր ունենալու անհրաժեշտություն չկա։

Ի՞նչ փաստաթղթեր են անհրաժեշտ

Օտարերկրյա ֆիզիկական անձի կողմից Հայաստանում ՍՊԸ գրանցելու համար, կախված կոնկրետ դեպքից, հիմնականում անհրաժեշտ են՝

• հիմնադրի անձնագիրը,

• անձնագրի հայերեն նոտարական թարգմանությունը,

• ընկերության անվանումը,

• տեղեկություն ընկերության գործունեության մասին,

• ընկերության իրավաբանական հասցեն,

• տեղեկություններ ընկերության տնօրենի վերաբերյալ,

• հիմնադրման մասին որոշումը կամ մասնակիցների ժողովի արձանագրությունը,

• ընկերության կանոնադրությունը։

Եթե փաստաթղթերը ներկայացվում են ներկայացուցչի միջոցով, անհրաժեշտ է նաև պատշաճ ձևով կազմված լիազորագիր։

Կոնկրետ փաստաթղթերի ցանկը կարող է տարբերվել՝ կախված ընկերության կառուցվածքից, հիմնադիրների քանակից և այլ հանգամանքներից։

Պե՞տք է օտարերկրացին անձամբ գտնվի Հայաստանում

Ոչ բոլոր դեպքերում։

Ընկերության գրանցման գործընթացը կարող է կազմակերպվել նաև լիազորված ներկայացուցչի միջոցով, եթե առկա է համապատասխան լիազորագիր։

Սա հատկապես հարմար է այն օտարերկրյա քաղաքացիների համար, ովքեր ցանկանում են նախապես ստեղծել իրենց բիզնեսը Հայաստանում՝ առանց միայն ընկերության գրանցման նպատակով Հայաստան այցելելու։

Կարո՞ղ է օտարերկրացին լինել նաև ընկերության տնօրեն

Օտարերկրյա քաղաքացին կարող է ոչ միայն հանդիսանալ ընկերության մասնակից, այլև նշանակվել ընկերության տնօրեն՝ օրենսդրությամբ սահմանված պահանջների պահպանմամբ։

Սակայն ընկերության գրանցումը, աշխատանքային հարաբերությունները, հարկային պարտավորությունները և օտարերկրացու՝ Հայաստանում գտնվելու կամ աշխատելու իրավական հիմքերը տարբեր իրավական հարցեր են և յուրաքանչյուր դեպքում պետք է գնահատվեն առանձին։

Ընկերության գրանցումը ավտոմատ կացության իրավունք տալի՞ս է

Ոչ։

Հայաստանում ընկերություն գրանցելը կամ ընկերության մասնակից դառնալն ինքնին չի նշանակում, որ օտարերկրացին ավտոմատ կերպով ստանում է կացության կարգավիճակ։

2026 թվականի նոյեմբերի 1-ից ձեռնարկատիրական գործունեության հիմքով կացության կարգավիճակ ստանալու համար գործում են նոր պահանջներ։

Մասնավորապես, առևտրային կազմակերպության մասնակից, բաժնետեր կամ արժեթղթերի սեփականատեր հանդիսացող օտարերկրացու դեպքում օրենքը նախատեսում է առնվազն 2,000,000 ՀՀ դրամի ներդրում առևտրային կազմակերպության կանոնադրական կապիտալում կամ նույն արժեքով բաժնետոմսերի կամ արժեթղթերի ձեռքբերում։

Անհատ ձեռնարկատիրոջ դեպքում նախատեսված է այլ չափանիշ՝ անհատ ձեռնարկատիրոջ հաշիվներին առնվազն 1,000,000 ՀՀ դրամի չափով գումար կամ կացության դիմումը ներկայացնելուն նախորդող 60 օրվա ընթացքում ձեռնարկատիրական գործունեության արդյունքում առնվազն 1,000,000 ՀՀ դրամի դրամաշրջանառություն։

Հետևաբար, եթե ընկերության ստեղծման նպատակը նաև Հայաստանում կացության կարգավիճակ ստանալն է, նպատակահարմար է ընկերության կառուցվածքը և ներդրումը պլանավորել դեռևս գրանցումից առաջ։

Ի՞նչ պետք է անել ընկերության գրանցումից հետո

Ընկերության պետական գրանցումը բիզնեսի ստեղծման առաջին փուլն է։

Կախված գործունեության տեսակից՝ հետագայում կարող է անհրաժեշտ լինել կազմակերպել՝

• հարկային հաշվառումը,

• բանկային հաշվի բացումը,

• պայմանագրերի կազմումը,

• աշխատողների ընդունումը,

• հաշվապահական սպասարկումը,

• անհրաժեշտ լիցենզիաների կամ թույլտվությունների ստացումը,

• օտարերկրյա աշխատողների աշխատանքի և կացության հետ կապված գործընթացները։

Այդ պատճառով ցանկալի է մինչև ընկերության գրանցումը հստակ որոշել, թե ինչ գործունեություն է իրականացնելու ընկերությունը և ինչ հարկային ու իրավական ռեժիմ է կիրառվելու։

Ընկերության գրանցում Հայաստանում LEGAL C-ի միջոցով

LEGAL C իրավաբանական ընկերությունն աջակցում է օտարերկրյա քաղաքացիներին Հայաստանում բիզնեսի ստեղծման և հետագա իրավական սպասարկման հարցերում։

Մենք կարող ենք աջակցել՝

• ընկերության գրանցման,

• անհրաժեշտ փաստաթղթերի պատրաստման,

• իրավաբանական հասցեի հետ կապված հարցերի,

• պայմանագրերի կազմման և ստուգման,

• կորպորատիվ իրավական հարցերի,

• կացության կարգավիճակի,

• բիզնեսի ընթացիկ իրավաբանական սպասարկման հարցերում։

Եթե ցանկանում եք ընկերություն գրանցել Հայաստանում կամ նախապես հասկանալ, թե որ կազմակերպաիրավական ձևն է համապատասխանում ձեր գործունեությանը, կարող եք դիմել LEGAL C իրավաբանական ընկերությանը խորհրդատվության համար։